皇馬歷史系列：傳奇人物-班拿貝
上回講到班拿貝主席領導下嘅皇馬經歷咗輝煌嘅50-60年代，同時亦概括咗班拿貝主席嗰陣做過嘅幾件重要事情。嚟緊嘅內容，將會講到班拿貝主席人生嘅最後篇章，同時亦係整個皇馬歷史系列班拿貝篇嘅最後一個篇章。
1) 皇馬Ｂ隊
1972年皇馬終於正式有自己嘅B隊Castilla。Castilla前身其實係一隊喺西丙比賽叫做AD Plus Ultra嘅業餘球隊，由於同皇馬關係友好，因此自40年代起已一直作為皇馬嘅預備隊。70年代AD Plus Ultra面臨解散，於是班拿貝主席正式接管咗AD Plus Ultra，仲改名為Castilla Club de Fútbol。Castilla宜家已經係一隊職業球隊，作為皇馬嘅預備隊同時亦係皇馬青訓學徙晉身職業世界嘅階梯，Castilla為皇馬提供咗多不勝數嘅名將，包括著名嘅皇馬5鷹、魯爾、古迪、聖卡斯、卡斯米路、華維迪等。Castilla最經典嘅一場比賽應該算係1980年殺到入國王盃決賽對皇馬嗰次。可惜嗰陣班拿貝主席已經唔喺度，唔可以親眼睇到呢場前無古人後無來者嘅「皇馬打吡」。
(PS：呢場決賽最後賽果係皇馬A隊以6-1贏得冠軍。)
(PS：1990-91賽季西班牙足協修例，已經唔再容許任何B隊出戰國王盃)
2) 生榮死哀
70年代係班拿貝出任主席皇馬會長嘅最後時期，可惜最後幾年時間佢因為健康原因已經無出席皇馬嘅公開活動，甚至連1977年球會75周年嘅紀念活動都出席唔到，只能夠透過發賀詞嚟表達對球會嘅祝賀。1978年6月2號，班拿貝主席因為癌症離世，終年82歲。班拿貝出主席離世嘅消息令整個世界球圈都為之震動同哀傷，當時正值世界盃舉行期間，國際足協於是破天荒咁連續3日下半旗致哀同喺之後嗰場比賽前進行默哀儀式。據報導當時有超過10萬人去到班拿貝球場去向班拿貝出主席遺體作悼念同告別。回顧班拿貝主席嘅一生，會發現早喺1948年班拿貝主席就已經憑對皇馬多年嘅出色工作和貢獻喺會員大會上被任命為榮譽主席，離世前幾個月更獲得咗由西班牙足協頒發嘅Medalla de Oro y Brillantes(榮譽金章)，同埋由西班牙國王親自頒授嘅Medalla de Oro al Mérito Deportivo(體育優異金章)。即使離世後亦因為喺足球管理上嘅成就而喺2002年被國際足協追頒「國際足協榮譽獎Ordre du mérite de la FIFA」作為表揚，到2014年更被國際足協入選到位於墨西哥嘅「足球名人堂Salón de la fama del fútbol」博物館添。而皇馬亦自1979年起每年都舉辦班拿貝盃友誼賽，作為對呢位前主席嘅紀念，可見班拿貝主席無論喺球會甚至整個世界球壇都係備受尊敬同推崇嘅。
3) 主席的話
“The Real Madrid shirt is white. It can stain of mud, sweat and even of blood, but never of shame!”
“皇家馬德里嘅球衣係白色。佢可以染上泥，染上汗，甚至係血，但唔會係羞恥！”
我唔直接答你，我用例子答你，遠嘅唔講，就講近嘅，2017-18年馬德里打吡次回合上半場36分鐘一次攻勢入面，拉莫斯喺禁區接應傳波飛身攻門嗰陣被馬體會球員踢中面部，即刻流晒鼻血，但止血後仍然堅持喺場上比賽，直到半場休息先至換出，之後證實原來嗰腳踢到鼻樑骨折。另一次再早啲，2013-14年歐聯決賽，皇馬36分鐘起就一直0:1落後，之後奮力反撲但仍然顆粒無收，直到補時93分鐘終於由拉莫斯頭鎚頂入而進入加時賽，最終皇馬加時再入3球反勝4-1而奪得球會第10次歐聯冠軍。上面講咗乜野，自己參透下啦。班拿貝主席作為曾經歷皇馬青訓、球員、隊長、助教、教練、董事、甚至主席等多重身份嘅人物，由佢口中講出嚟嘅說話，相信亦足夠代表同解釋咩係皇家馬德里嘅精神同價值。
班拿貝主席出任皇馬會長35年，單計足球隊已經攞咗16次西甲、6次國王盃、6次歐聯、2次拉丁盃、1次洲際盃，經佢簽入嘅名將包括迪史提芬奴、真圖、普斯卡斯、Raymond Kopa、Amancio、金馬曹、Juanito等多到數唔晒，而且佢亦為球隊留底咗班拿貝球場、Ciudad Deportiva訓練場等重要嘅建設，而皇馬因為喺佢嘅引領下亦都走上咗一條光輝嘅大道，所以佢一直被公認為皇馬最偉大嘅主席。班拿貝主席嘅故事就講到呢到，希望大家喺支持皇馬嘅同時，亦可以對皇馬嘅歷史或歷史上重要嘅人物有更多嘅認識啦。
本文資料取材自皇馬官網、維基百科中英文及西法德葡語版同其他關於皇馬嘅書籍，過程中admin已經盡力咁發掘同重組，但難免仍有所錯漏，如有發現，請多多包涵，不吝賜教。
回顧: 皇馬傳奇人物 班拿貝 part 1
https://realmadridhkfc.wordpress.com/about/bernabeu-part1/
回顧: 皇馬傳奇人物 班拿貝 part 2
Real Madrid Hong Kong Official Fans Club 