皇家馬德里香港官方球迷會

會員群組：會員專屬群組，喺入面可以認識到其他皇迷，仲可以一齊交流下添，內容除左皇馬本隊，仲有好多話題，由足球到生活資訊都有，真係唔愁無野傾，唔愁識唔到朋友。

睇波活動：唔使多解釋啦，通常早波、打吡或決賽我地都會搞下睇波團，等大家可以聚埋開心下。最多人嗰次，仲試過200人一齊睇歐聯決賽添，好熱鬧架。

足球同樂日：所有會員都可以參加嘅足球活動，就算唔入隊都可以一嘗踢波嘅樂趣。低強度，旨在開心玩波同出汗，球技不拘，男女適合。

球迷足球隊：不時會友賽外隊或其他球迷會，亦有自己分隊練波，只要加入咗足球隊就可以報名參加。友賽或練波以7人或11人仿草為主，間中亦會石地。

足球隊亦有參加聯賽，例如球迷會聯賽或外面嘅聯賽，俾有興趣嘅隊員可自費參加。

團體捐血：暫時我地約1年舉辦2次捐血活動，通常1月同6月，歡迎所有會員連同家人朋友出席，參與公益，回饋社會。

各式聚會：其他嘅聚會活動，過去我地曾經搞過睇電影、打邊爐、BBQ、飯局，嚟緊亦希望可以嘗試其他活動，歡迎大家提出意見，更歡迎幫手組織。

其他活動：球迷會不時會喺會員群組度舉行有獎遊戲，送下禮品；亦有應西甲或皇馬球迷會協會邀請參加Fantasy足球遊戲；前幾年更試過組隊參加渣馬10K，又搞過Online Running Challenge等。

會員團購：球迷會不時會搞下團購活動，等會員可以用會員價買到心頭好，又可以一齊分攤運費。曾經團購過嘅貨品包括熱門嘅官網男女裝波衫、服飾，甚至其他各式同皇馬有關嘅精品。

追星活動： 球迷會曾經去機場送過卡路士機，亦去過尖沙咀adidas等施丹 ，2023年仲參加有摩連迪斯嘅西甲訓練營。

其實都真係好多嘢玩，大家快啲加入皇家馬德里香港官方球迷會， 成為一個Hong Kong Madridista 啦！