皇馬傳奇人物：班拿貝 part 2

皇馬歷史系列：傳奇人物-班拿貝

上回講到班拿貝喺偶然情況下被董事會任命為皇馬主席，自此皇馬嘅發展就同呢位主席嘅故事再分唔開，可以話班拿貝主席嘅故事其實就等於皇馬嘅故事。

1) 重建主場
班拿貝主席一直都希望能為球隊興建一個新嘅球場，於是1943年佢做咗皇馬主席後嘅第一件大事，就係重建當時只能容納25000人嘅查馬丁球場Estadio de Chamartín。第二年佢喺得到銀行嘅貸款支持下，開始咗原址重建球場嘅工程。3年後，一座當時最先進、最現代化同可以容納75000人嘅新球場終於落成，當時取名新查馬丁球場Nuevo Estadio Chamartín。過咗幾年，皇馬嘅會員大會決定將球場自1955年1月4號起正式改名為聖地牙哥·班拿貝球場Estadio Santiago Bernabéu，作為紀念班拿貝主席喺球場重建嘅努力同內戰後重組球隊嘅貢獻。
(PS：1947年新球場落成後，班拿貝主席對球場嘅改建其實一直都無停過，1953年改建外圍建築，到1954年又完成咗第1次大型改建工程，1955年球場改名後，球場又開始咗第2次大型改建，將球場擴建到可以容納125000人，1957年又更新照明系統，之後仲陸陸續續加入各種新嘅現代化設備添。)

2) 神的金箭
班拿貝主席任內簽下嘅名將多不勝數，但最具代表性嘅一定就係球隊永遠嘅傳奇「金箭頭」迪史提芬奴。時值1952年皇馬嘅50周年，班拿貝主席於是請嚟咗哥倫比亞嘅百萬富翁同瑞典嘅諾高平嚟進行一場三角賽。迪史提芬奴身為百萬富翁嘅前鋒，用驚人嘅演出令皇馬吃盡苦頭，亦因此引起咗班拿貝主席嘅留意而決心要簽佢返嚟。雖然迪史提芬奴嘅轉會充滿爭議，甚至引致足協方面出嚟調停，但最終佢都係加盟咗我哋皇馬。至於迪史提芬奴為皇馬效力11年間嘅榮譽同數據，admin就唔特別講啦，因為都唔會有皇迷唔知架啦。
(PS : 迪史提芬奴嘅轉會爭議，歷史上從來都無一個完整又絕對嘅答案。簡單嚟講，三角賽後皇巴兩隊都透過唔同途徑買入咗迪史提芬奴嘅擁有權，於是搞到足協要出嚟做和事佬，但足協嘅方案竟然係球員為兩隊輪流效力，之後，親皇馬嘅講法係巴塞拒絕咗足協嘅方案而選擇放棄同賣出迪史提芬奴；親巴塞嘅講法係足協嘅方案無法接受，加上政府嘅壓力所以唯有放棄。當中嘅細節同經過既無歷史定論亦唔係本文嘅主要內容，觀乎事實，唯一可以肯定嘅係皇馬喺呢次爭奪中係最後贏家。)

3) 歐聯推手
歐聯賽事因為皇馬獨佔13個冠軍加上成立之初就5連冠同近年又3連冠而被部分人戲稱為“皇馬盃＂，但就算唔睇呢啲獎盃數，歐聯賽事嘅成立同皇馬、同班拿貝原來都有一段故事嘅。事源1955年歐聯賽事由Gabriel Hanot提出成立嗰陣，歐洲足協同國際足協都唔支持嘅，但貝拿貝主席當時以皇馬主席身份反而對賽事相當感興趣，於是成為賽事支持者之一，以西甲衛冕冠軍嘅身份去代表西班牙去推動賽事組建，而且更喺一個賽事組建嘅執行委員會入面擔任第一副主席，協助擬定賽事要點尋求足協認可。最後終於令歐洲足協改變態度，而且更令歐洲足協同意成為賽事主辦機構，於是1955年就舉辦咗第1屆嘅歐聯賽事。而我哋皇馬亦喺1955-60年嘅頭5屆賽事贏得咗5連冠，之後到近年皇馬喺歐聯嘅戰績就算我唔多講，大家都好清楚啦。
(PS：歐聯賽事原先叫做「歐洲冠軍球會盃European Champion Clubs’ Cup」，宜家「歐洲聯賽冠軍盃European Champions League」係1992年改制後嘅名，上文為方便閱讀理解，一律統稱歐聯。)

4) 高瞻決定
班拿貝做主席嗰陣，一直努力咁將球會架構重組同進行專業化，於是，1963年嗰陣佢作出咗個大膽、創新又重要嘅決定，就係喺當時嘅市郊為球隊興建一個訓練中心，於是Ciudad Deportiva就此誕生，從此球隊亦終於唔使再用主球場嚟練波。呢件事嘅重要性，不單為球隊提供咗一個先進專業嘅訓練基地，而且影響更深遠到40年後。因為皇馬喺2000年嗰陣將呢個訓練中心賣出咗4.8億歐元，用嚟還清咗當時所有債務之外，仲興建咗宜家嘅訓練基地Ciudad Real Madrid，又買入咗費高，開始一年一星嘅銀河艦隊一期時代。可以話銀河艦隊一期到二期嘅近年輝煌，都離唔開當日班拿貝主席嘅呢個決定。

50-60年代係皇馬嘅一個高峰期，55-60年連續5奪歐聯冠軍，53-69年嘅16年間12奪西甲，期間名將多不勝數，但背後一切都有賴於班拿貝主席嘅精心經營同獨具惠眼嘅球員收購策略，不過呢啲往往都無咁令人留意，希望上文可以令大家有多一啲嘅認識同興趣。

本文資料取材自皇馬官網、維基百科中英文及西法德葡語版同其他關於皇馬嘅書籍，過程中admin已經盡力咁發掘同重組，但難免仍有所錯漏，如有發現，請多多包涵，不吝賜教。

回顧: 皇馬傳奇人物 班拿貝 part 1

https://realmadridhkfc.wordpress.com/about/bernabeu-part1/

進入：皇馬傳奇人物 班拿貝 part 3

https://realmadridhkfc.wordpress.com/bernabeu-part3/