皇馬傳奇人物：班拿貝 part 1

皇馬歷史系列：傳奇人物-班拿貝

班拿貝就聽得多，等球迷會同大家講下關於呢位前主席嘅故事啦。

1) 投身皇馬
班拿貝主席全名“聖地牙哥·班拿貝·耶斯迪Santiago Bernabéu Yeste＂，生於1895年8月6日嘅西班牙Almansa呢個地方。
5歲嗰陣同家人搬到馬德里，之後接觸到足球呢個運動，佢嘅一生從此就同足球再分唔開。作為球迷，我哋總會對球員能夠由青訓出身，一路踢到主力然後掛靴並成為球隊傳奇充滿浪漫嘅憧憬同幻想，所以我哋皇迷先會特別鍾情魯爾同聖卡斯等皇馬出身球員，甚至渴望佢哋有日返嚟執教一隊。而班拿貝正正係呢方面嘅代表嘅極致，有法律學位但唔去做律師，反而留喺球隊效力，一路由青訓、球員、隊長、助教、教練、董事、主席咁做，不單做勻球員同管理層嘅每一個崗位，而且每一個崗位都同樣出色。班拿貝甚至將佢一生都奉獻咗俾皇馬，直至離世一刻，做到真正嘅鞠躬盡瘁、死而後已。

2) 青訓射手
1911年，班拿貝加入皇馬青年隊，3年後升入一隊，1915-21年期間擔任隊長，喺皇馬效力到1927年掛靴退役。打前鋒嘅佢喺一隊效力期間為皇馬正式出場79次並射入68球，為球隊攞咗9次地區盃賽冠軍同1次國王盃冠軍，球員生涯嘅其中4年甚至係球隊嘅首席射手。雖然79次出場好似好少，但唔好忘記講緊嘅係上世紀初嘅地區賽事，賽事就算到1935年嗰陣都只係有6隊同一季踢10場。如果用入球率嚟計，班拿貝嘅0.86球對比起C朗嘅1.03、迪史提芬奴嘅0.78、曉高山齊士0.73球亦絕不輸蝕。
(PS：皇馬成立嗰陣原稱馬德里足球會，到1920年先獲授皇家頭銜。上文為方便閱讀理解，一律統稱皇馬。)

3) 救火教練
1926年12月，皇馬主教練Juanito Cárcer被停職，時任助教嘅班拿貝被球隊臨時拉夫去聯同Peris Llorente一齊出任主教練，直到1928年1月José Ángel Berraondo嚟執教為止。之後班拿貝就繼續做返助教，一年之後佢被任命為皇馬董事，負責秘書處嘅職務到1935年。翻查紀錄，1926-27由班拿貝同Peris Llorente共同執教嘅嗰嗰個賽季，皇馬係贏得咗地區盃賽冠軍架。

4) 戰後重建
1936年西班牙內戰爆發，所有體育活動包括足球都無法進行。3年後戰事結束，班拿貝返到嚟皇馬，發現球隊主場查馬丁球場Estadio de Chamartín已經倒塌，而且一啲早年獲得嘅獎杯亦被偷走，球會董事、球員等亦因為戰事而各散東西甚至離世。班拿貝用咗幾個月去東奔西走，周圍去搵同聯繫，好唔容易咁終於聚集返啲人返嚟皇馬。而班拿貝之後就繼續擔任董事，輔助當時嘅主席對皇馬進行各種戰後嘅重建工作。

5) 出任主席
1943年6月19號嘅一場歷史性賽事造就班拿貝登上主席位。話說1943年嘅西班牙盃4強賽事皇馬遇上巴塞，球隊先作客下輸0-3，但返到主場就狂數巴塞11-1反勝晉級，而呢場亦係至今皇巴之間最大比數差距嘅賽果。呢場波之後，雙方球迷打起咗上嚟，結果令政府要求兩間球會嘅主席同時辭職，於是，班拿貝就被董事會任命為新主席。
(PS：可惜之後決賽皇馬最終加時0-1不敵畢爾包而無緣冠軍。)